बाल दिवसमा वीरगञ्जमा प्रभातफेरी

६० औँ राष्ट्रिय बाल दिवस वीरगञ्जमा एक  कार्यक्रम गरी मनाइएको छ ।

‘बालबालिकामा लगानी, सुरक्षित भविष्यको थालनी’ भन्ने नारासहित दिवसका अवसरमा आज वीरगञ्जमा प्रभातफेरी निकाल्नुका साथै र सडक नाटक प्रदर्शन गरिएको छ ।

वीरगञ्जको घण्टाघरबाट सुरु भएको प्रभातफेरी माइस्थान चोक, आदर्शनगर, घडिअर्वा हुँदै पुन: घण्टाघर आएर सभामा परिणत भएको थियो ।

प्रभातफेरीपछि आयोजित सभालाई सम्बोधन गर्दै वीरगञ्ज महानगरपालिकाका प्रमुख राजेशमान सिंहले बालबालिकाको शिक्षा, स्वास्थ्यलगायतका अधिकार सुनिश्चित गर्ने कार्यलाई आफूहरुले प्राथमकितामा राखेर योजना बनाउने काम गरिरहेको बताउनुभयो । पढ्ने अवसरबाट कुनै पनि बालबालिका वञ्चित हुन नपरोस् भन्ने कुरामा आफूहरु सचेत रहेको र लक्षित वर्ग केन्द्रित छात्रवृत्ति, दिवा खाजा र विद्यार्थीमैत्री पाठ्यक्रमको व्यवस्था गर्ने नीति अंगिकार गरिएको बताउनुभयो ।

यस्तै महानगरपालिकाका उपप्रमुख इम्तियाज आलमले बालबालिकाको क्षेत्रमा गरिने लगानीले राष्ट्रकै भविष्य निर्धारण गर्ने हुँदा त्यसमा वीरगञ्ज महानगरपालिकाले निरन्तर लगानी गर्दै आएको बताउनुभयो ।

बालबालिका विरुद्धका हिंसा, दुव्र्यवहार शोषण लगायत बालबिवाहजस्ता कूप्रचलनका घटनाहरु पूर्ण रुपमा न्यूनीकरण गर्दै बास्तविक बाल अधिकार प्रवद्र्धन गर्नुपर्ने दायित्व हामी सबैको काँधमा रहेको बताउनुभयो । उहाँले स्वास्थ्य तथा शिक्षामा बालबालिकाको पहुँच वृद्धि गर्दै उनीहरुको शैक्षिक अधिकार सुनिश्चित गर्न माध्यमिक तहसम्मको शिक्षा प्राप्तिमा महानगरले निशुल्क व्यवस्था मिलाएको जानकारी दिनुभयाे । 

कार्यक्रममा लागु पदार्थ दुर्व्यसन र बालविवाहका बारेमा सचेतना फैलाउने सडक नाटकसमेत बालबालिकाहरुले प्रदर्शन गरेका थिए ।