बालबालिकाको उज्यालो भविष्यका लागि नयाँ सुरुवात

हामी भन्ने गर्छौं– बालबालिका कर्णधार हुन्, भोलिको देश निर्माता हुन् र वर्तमानका साझेदार हुन् । हो, यिनै बालबालिकाका आवाजलाई निरन्तर उठाइरहने प्रतिबद्धतासहित हामी तपाईंहरूमाझ आएका छौं– बालसंसार डटकम लिएर । 

यो एउटा अनलाइन पत्रिका हो । हामीले आमसञ्चारको एउटा पक्षलाई मात्रै सम्बोधन गरेर अघि बढ्ने लक्ष्य राखेका छौं । 

प्रसारण तथा प्रकाशनका विभिन्न माध्यमहरूबाट कार्यक्रम उत्पादन, प्रसारण तथा रिपोर्टिङ गर्ने काम यो अनलाइनले गर्नेछ । यो केवल वेबसाइट मात्र होइन, बालबालिकाका लागि ज्ञान, मनोरञ्जन र सिर्जनात्मकताको अनन्त सम्भावनाको एउटा संसार पनि हो । 

शिक्षा र स्वास्थ्य संविधानले किटान गरेका आधारभूत अधिकार हुन् । यसमा बालबालिकाको पहुँच विस्तार महत्वपूर्ण विषय हो । यसतर्फ हाम्रो ध्यान जानेछ ।

आजको डिजिटल युगमा बालबालिका पनि प्रविधिको मुख्य हिस्सा बनिसकेका छन् तर यसमा उनीहरूको सुरक्षा, मानसिक विकास र सिकाइलाई केन्द्रमा राखेर तयार गरिएको प्लेटफर्म भने कमै छन् । यसै अभावलाई पूर्ति गर्ने र बालबालिकाको आवश्यकताअनुरूप सामग्री प्रदान गर्ने उद्देश्यले हामीले यो अनलाइन सुरु गरेका हौं ।

हाम्रो लक्ष्य बालबालिकाको जिज्ञासालाई प्रोत्साहन गर्दै उनीहरूको रुचि र प्रतिभालाई सही दिशा दिनु हो ।

विज्ञान र प्रविधिले सञ्चारका लागि अनेकन साधनहरू सिर्जना गरिदिएको छ । सञ्चारमाध्यम तथा प्रविधिको विकासले अशोचनीय फड्को मारेको छ । आमसञ्चार माध्यम भनेका छापा, विद्युतीय र अनलाइनमात्र हुन् भन्ने लाग्दैगर्दा न्यु मिडिया र सामाजिक सञ्जालले हामीलाई छोपिसकेको छ । तिनलाई पन्छाएर परम्परागत माध्यममै रमाउन नसकिने अवस्था छ । 

मिडियाको काम आममानिसलाई शिक्षा, सूचना र मनोरञ्जन दिने नै हो । नेपाली पत्रकारितामा छापा, रेडियो र टेलिभिजन परम्परागत मिडियाका रूपमा परिचित छन् ।
विगतमा छापा माध्यममा धेरैवटा बालपत्रिकाहरू छापिए, केही छापिइरहेकै छन् । रेडियो, एफएम र टेलिभिजनहरूमा बाल कार्यक्रम सुचारु छन् तर सञ्चारका साधनहरूको तीव्र विकाससँगै ती सबै विस्तारै छेउ लागिरहेका छन् ।

पछिल्लो डेढ दशकमा छापामाध्यमको स्थान अनलाइनले लिएको छ । अहिले न्युमिडियाले आमसञ्चारमा चुनौती र अवसर लिएर आएको छ । यही परिवेशमा हामीले बालबालिका लक्षित अनलाइन तथा न्युमिडिया रोजेका हौं । यसका माध्यमबाट बालबालिकाका समग्र पक्षलाई उजागर गर्ने हाम्रो प्रयत्न रहनेछ । 

भ्यु फाइन्डर नेपाल कम्पनी प्रालिअन्तर्गत सञ्चालित बालसंसार डट कमबाट हामी बालबालिका लक्षित सामग्री त पस्किन्छौं नै, सँगसँगै नेपालको संविधान (२०७२) ले सुनिश्चित गरेका बालअधिकारका पक्षमा आवाज पनि उठाउने छौं । ती विषयमा सरकारको ध्यानाकर्षण गराउने छौं ।

नेपाल सरकार संयुक्त राष्ट्रसंघको पक्ष राष्ट्र हो । सरकारले अन्तर्राष्ट्रिय सन्धि, महासन्धिहरूमा हस्ताक्षर गरी बालअधिकार सुनिश्चित गर्न जनाएका प्रतिबद्धताहरूप्रति हामी चनाखो भइरहने छौं ।

हाम्रो प्रमुख सरोकार पक्ष भनेका प्रत्येक बालबालिका हुन् । ती बालबालिकाका अभिभावक हुन् । घरपरिवार, समाज, बालबालिकालाई शिक्षादीक्षा दिने शिक्षालयहरू हुन् । ती स्वास्थ्यकर्मी र स्वास्थ्य संस्थाहरू पनि हाम्रा सरोकार पक्ष हुन्, जो बालबालिकालाई स्वस्थ राख्न निरन्तर सेवारत छन् ।

बालबालिकाको सर्वाङ्गिण विकासमा अभिभावक, शिक्षक र विद्यालयले दिने गरेका उदाहरणीय समय, समर्पण अनि प्रबद्र्धन कार्यलाई हामी उजागर गर्नेछौं । बालबालिकाका हितमा बनेका ऐन, कानुन, नीति नियमहरू र त्यसको कार्यान्वयन गर्ने निकायको ध्यानाकर्षण गराउने छौं ।

हाम्रो पहललाई सबैले सकारात्मक रूपमा लिएर आवश्यक सहयोग गर्नु हुनेछ भन्ने विश्वास लिएका छौं । धन्यवाद !